|
Проекција на кратки едукативни филмови во Скопје, Штип, Велес и Неготино |
|
|
 Во текот на оваа недела, се одржаа неколку проекции на едукативните филмови изработени во рамките на проектот „Приватност на интернет на лесен начин“. Беа опфатени деца од Скопје, Неготино, Велес и Штип, а другата недела следуваат проекции уште во 4 други градови низ нашата република.
На 31 мај, во Детскиот Театарски Центар, со почеток во 19:00 часот, се одржа проекција на кратките едукативни филмови, кои се дел од проектот „Приватност на интернет на лесен начин“ на Фондацијата Метаморфозис, а се изработени во соработка со Детскиот Театарски Центар. На проекцијата присуствуваа ученици од основното училиште „Петар Здравковски – Пенко“, кои воедно беа и актери во филмовите. На крајот, секое од децата доби подарок дивиди со филмовите, постер и брошура.
Оваа проекција беше прва од низата настани кои се одржуваат низ градовите во Република Македонија. Па така, на 1 јуни, во 10 часот во просториите на Општина Штип се одржа втората проекција на едукативните филмови на која присуствуваа 80-на деца од основните училишта „Ванчо Прке“, „Тошо Арсов“, „Гоце Делчев“ и „Димитар Влахов“. Учениците добија брошури и постери кои се изработени во рамките на овој проект, а училиштата добија и пакет материјали наменети за училиштето, како и примерок од дивиди со филмовите, со цел да се допре и до останатите ученици во овие училишта.
По настанот во Штип, проекција се одржа и во Велес, во 14:30 часот во просториите на Фондацијата Фокус каде присуствуваа десетина деца од основното училиште „Кирил и Методиј“. Освен децата од ова училиште, материјали беа доставени и до основните училишта „Јордан Хаџи Константинов – Џинот“, „Благој Кирков“, „Блаже Конески“, и „Васил Главинов“.
Четвртата проекција се одржа на 2 јуни, со почеток во 11 часот, во просториите на Општина Неготино, каде салата беше преполна со ученици (околу 90) од основните училишта „Страшо Пинџур“ и „Гоце Делчев“. И овие дечиња, како и претходните добија материјали за нив, но и за училиштата.
Проекциите продолжуваат следната недела и во други градови:
- Тетово - 6 јуни, почеток: 11.00 часот, место: Лоја;
- Гостивар - 6 јуни, почеток: 14.00 часот, место: Центар на културата;
- Битола - 7 јуни, почеток: 11.30 часот, место: Младински културен центар
- Дебар - 8 јуни, почеток: 12 часот, место: Дом на културата.
|
